(२२) खुइलिएको अँगार

सबैले जानेजती उपमा दिएर ,
तिमीलाई कृष्ण बाहेक केही देखेनन ।
आज तिम्रो आवरणको कलेवरमा ,
परिवर्तन देखिन्छ ,
अनौठो नमाने पनि अनौठो ,
नदेखिए पनि देखिएको ,
नखुइलिए पनि खुइलिएको ,
खुइलिएको अँगार ।

तिमी आफैंले त आफूलाई ,
देख्छौ नै उत्कृष्ट भन्दा पनि
सर्वोत्कृष्ट ,
सपनाको अदभूत साकार ,
कल्पनाको अनुपम साक्षात्कार ,
तिम्रै विशेष योगदानमा ,
नेपाली शब्दकोषले ,
किलोसेरा भित्र्याएको दृष्टान्त ,
म भुलौं कसरी ?
अनि तिमी बन्दै छौ ,
अर्काको डालाको सहायतामा ,
आफ्नो पात फैलाउने ,
ऐजेरु ।

हिङ नै नबाँधिएको हिङको टालो ,
माकुरै नहुने एकादेशको माकुराको जालो ,
रङ हराएपनि नामैले कालो ,
खुइलिएको अँगार ।
समयको कालखण्डमा ,
तिम्रो आवश्यकतालाई ,
आवश्यकताअनुसार ,
आ-आफ्नै तवरले ,
अपनाएकै हो ,
कसै न कसैले ,
कुनै न कुनै ,
तवरले ।

आज नउडे पनि रङ उडेको छ ,
नउजाडिए पनि बस्ती उजाडिएको छ ,
फुङ्ग तिम्रो रङ ,
खुइलिएको अँगार ।

-२०८० मंसिर ०९ , दमक ।