(२५) बादलले छोपिएकी जून

सकेसम्म त उज्यालोमा ,
सदैव रहन खोजेकै हौ ।
पूर्णिमाको तिम्रो उदय ,
आलोचनात्मक साथ ,
अथक प्रयास ।
तथापि ...
तथापि ,
तिमीलाई
बादलले छोपेको छ !

कसैले
तिम्रो नाम बेचे ,
कसैले काम ।
कसैले चेत बेचे ,
कसैले दाम ।
तिमीले हरेकलाई ,
विस्वास गर्‍यौ ।
आज तिनै ,
विस्वासीला पात्रहरू ,
खलपात्र बनिदिंदा ,
तिमी रनभुल्लमा ,
रुमलिएको देख्छु !
अनि ...
अनि ,
तिम्लाई
बादलले छोपेको छ !

दलाललाई साक्षी राखी ,
स्थापित दलानलाई ,
तिमी नाघ्ने होइन ,
मास्ने प्रयास गर !
किनकि ,
तिमी चेतनाको बिज ,
निरंतरताको सुचालक ,
ममताको खानी ,
समाजको द्योतक हौ l
तथापि ...
तथापि ,
तिम्लाई
बादलले छोपेको छ !

तिमीलाई पनि त मन होला ,
केहि दिन ,
केही समय ,
केही हप्ता ,
स्थिर रहने !
तर ...
कस्ले बुझ्ने ,
तिम्रो इच्छा ,
तिम्रा चाहना ,
तिम्रो मनोभावना ,
तिम्रो संवेदनशीलता ,
किनकि ...
किनकि ,
तिम्लाई
बादलले छोपेको छ !

मौनतालाई स्वीकार सम्झी ,
गरिएका सम्झौतालाई ,
तिमी मान्ने होईन ,
लत्याउने प्रयास गर ।
किनकि ,
तिमी सृष्टिको जननी ,
दृष्टिको नानी ,
ममताको खानी ,
समाजको द्योतक हौ ।
त्यसैले ...
त्यसैले
तिम्लाई
बादलले छोप्नु हुन्न!

२०८० मंसिर २९, दमक ।