(२७) जूनको मिस्ड कल

कहिल्यै फोन नआउने जूनको ,
देखें आज मिस्ड कल ,
क्लिक गरि खोलेँ कल डिटेल ,
लेखिएको थियो ...
र्‍याङ्ग टु टाइम्स !

कल जूनकै थ्यो ,
कल ब्याक मैले गर्नै पर्थ्यो ।
तर ...
मानेन मन ,
लागेन चोरी औंलो ,
थिच्न बटन ,
कल ब्याकको ।
मिस्ड कल भएपनि जूनको ,
आयो मनमा अनायासै बानी उनको ।
कुनै कालखण्डमा ...
कुनै कालखण्डमा ,
म कल गर्थें ,
दुई रिङ्ग गएपछि ,
जूनको सट्टा ,
कम्प्युटरकी बनावटी जून बोल्थिन ...
`द नम्बर यू आअ डायलिङ इज करेन्टली बिजी ,
प्लिज ट्राइ अगेन लेटअ!´

ऊबेला उनको वजन थ्यो
ठ्याक्कै किलोमा ,
आज वजन एक ग्राम भएपछि ,
उनले सम्झिन क्यारे !
नत्र किन गर्थिन र ,
मिस्ड कल !

आज ,
आज चर्खाको घुमाई ,
उल्टिएको छ ,
किलो नै नपुगे पनि ,
वजन मेरो पनि बढेकै छ ,
केही खुड्किला चढेकै छ ,
जूनले नै नपत्याए पनि ,
कसै न कसैले ,
कुनै न कुनै रुपमा ,
केहि न केहि आकारमा ,
कस्तो न कस्तो स्वरुपमा ,
पत्याएकै छन ।
सायद ...
सायद त्यही भएरै होला ,
मेरो मधुरो प्रगतिको रापले ,
जूनको तापलाई ,
ओझेलमा पारेपछि ,
मिस्ड कलको सहारामा पुगिन क्यारे !
तथापि ...
तथापि मेरो चोरी औंलोले थिचेन ,
कल ब्याक बटन ।

कसैले फुलाइदिएको बलुन ,
जूनको गन्तव्य बिहिन उडान ।
कसैले टासिंदिएको प्राइस ट्याग ,
जूनको अधिमुल्यन ।
कसैले फुकिदिएको कान ,
पत्याउनै नपर्ने कुराको मान ।
हिजोका तिम्रा अधि सुसारे ,
आजका कुरौटे अधि बेसारे ।
सबै सबै मैले देखिसकें ,
तिम्लाई बोक्नेले सायद बोकिसके ।

अब ...
अब तिम्रो पूर्णिमा ,
बनिसकेकोछ औंसी ।
सायद त्यही थाहा पाएर होला ,
आज तिम्रो मनमा फराकिलो ,
फरकपना आयो ,
अनि पुग्यौ निर्णयमा ,
मिस्ड कलको ।
तर ...
तर ,
मेरो चोरी औंलोले थिचेन ,
कल ब्याक बटन ।

आज तिम्लाई देखाइएका सपनाहरू ,
झरेका छन् भुइँभरी ।
कोहि भुइँमान्छे ,
तिनै सपना टिपेर ,
सिउरिन खोज्दैछ्न शिरमा ।
तर ...
तर तिम्रा सपनाद्रष्टा ,
आज भूमिकाको पर्खाइमा ,
भुमिगत सरह ,
शहरका गल्लीमा ,
रुमलिएको देखिन्छन् ।
सायद ...
सायद त्यसको ,
प्रत्युत्पादनमा ,
तिमीले मलाई मिस्ड कल गर्‍यौ ।
तर ...
तर मेरो चोरी औंलोले थिचेन ,
कल ब्याक बटन ।

-२०८० पौष २०, धरान ।