(२९) सहिदले सिकाएको पाठ

पाठ - १
अँध्यारो मन नपराउने तिमी ,
हरेक अन्धकारबाट पनि ,
पाठ सिक्दै जानु ;
अरु केहि नसिकेपनि ,
अँध्यारोमा हिड्दा ,
उज्यालो चाहिँ लिएरै हिड्नु ।

पाठ - २
फूल मनपराउने तिमी ,
फकृएका हरेक थुङ्गाबाट ,
पाठ सिक्दै जानु ;
अरु केहि नसिकेपनि ,
काँडाघारीमा हराउँदा,
गुलाफी मुस्कुराउन सिक्नु ।

पाठ - ३
गणित मनपराउने तिमी ,
हरेक सुत्रबाट ,
जीवन सिक्दै जानु ;
अरु केहि नसिकेपनि ,
सयबाट बाह्र झिके ,
शुन्य हुन्छ भन्ने जान्नु ।

पाठ - ४
सहयात्रीको याद मनपराउने तिमी ,
हरेक यात्राबाट पाठ सिक्दै जानु ;
अरु केहि नसिकेपनि ,
उसलाई अभावको महसुस ,
अवश्य गराउनु ।

पाठ - ५
हरेक कुरामा उपयोगिता देख्ने तिमी ,
बाढीमा पनि उपयोगिता देख्नु ;
अरु केहि नदेखेपनि ,
एक ठाउँमा समस्या बनेको नदीलाई ,
अर्को ठाउँमा प्राकृतिक स्रोत बनाउनु ।

पाठ - ६
एकान्त मन पराउने तिमी ,
एकान्तमा एकत्रित हुन सिक्नु ;
अरु केहि नसिकेपनि ,
एकान्त बासमा ,
सादृश्यता अवश्य सिक्नु ।

पाठ - ७
औषधि अधिक लिने तिमी ,
हरेकको स्वाद लिनु ;
अरु केहि नलिएपनि , सिटामोलको तितो ,
र हनिटसको गुलियो छुट्याउन सक्नु ।

पाठ - ८
चोट सहन मनपराउने तिमी ,
हरेक चोटबाट सिक्दै जानु ;
अरु केहि नसिकेपनि ,
चर्मचोट भन्दा ,
मर्मचोट ,
बढी पिडादायी भन्ने बुझ्नु ।

पाठ - ९
सधैं सत्यको पक्षमा बोल्ने तिमी ,
आफ्नो सत्यतामा अडिग रहनु ;
अरु केहि नभएपनि ,
बनावटी होईन ,
स्वयं सिद्ध सत्यको वकालत गर्नु ।

पाठ - १०
बिद्रोह मन पराउने तिमी ,
हरेक बिद्रोहबाट ,
पाठ सिक्दै जानु ;
अरु केहि नसिकेपनि ,
बिद्रोह गर्दा ,
सामुहिकता साथै राख्नु ।

- २०८०, माघ १६, सहिद दिवस । धरान ।