(३०) जूनको अदभूत शंख

शुभ देखि अशुभ ,
हरेक कार्यको प्रतिक ।
तर ,
अरुले जसरी फुक्यो ,
उसरी मात्र बज्ने
तिम्रो शंख ,
जूनको अदभूत शंख ।

फरकफरक भूगोलको ,
फरकफरक माटोमा ,
फरकफरक यात्राको ,
साँघुरो देखि
फराकिला बाटामा ,
पथ प्रदर्शक ।
तर ,
अरुले जसरी फुक्यो ,
उसरी मात्र बज्ने
तिम्रो शंख ,
जूनको अदभूत शंख ।

बौद्धिक दासताबाट ,
बौद्धिक अराजकता ,
बौद्धिक मौनताबाट,
बौद्धिक निपुणता ,
सबैमा चेत छर्ने ।
तर ,
अरुले जसरी फुक्यो ,
उसरी मात्र बज्ने
तिम्रो शंख ,
जूनको अदभूत शंख ।

एकाबिहानै झिसमिसे अघि
बेलुका ठुलो साँझ पछि ,
अघि-पछि , अघि-पछि
अघिअघि पछिपछि
बास !
बजाइदिन्छ अर्कैले ,
कहिले तालमा
कहिले सुरमा ,
कहिलेकाहीँ ताल न बेतालमा ।
तर पनि ,
तिमीलाई
शंखको मालिकको ,
मनगढन्ते मनग्गे ,
आत्मानुभुतिको
भुत सवार भएको देख्छु ।
आफैंलाई तेर्स्याउँछु
एक प्रश्न ,
आखिर कुन समुद्रको
उत्पादन हो यो ?
अरुले जसरी फुक्यो ,
उसरी मात्र बज्ने
तिम्रो शंख ,
जूनको अदभूत शंख ।

-२०८० माघ २३, धरान ।