(३५) जूनको जूनाफमा

सिङ्गो शरीर बोकेर हिड्ने खुट्टा ,
भौंतारिन्छ आफैं जुत्ताको लालचमा ।
किनकि ,
बिजुली बत्तीको निर्माण गर्न ,
बिजुली बत्ती नै चाहिन्छ , जून !

ढोका थुनेर बिरालो कुट्ने कुरा गर्‍छ्यौ ,
तर ढोकामा दुबैतर्फ चुक्कुल हुन्छ ।
किनकि ,
बहु वैकल्पिक प्रश्नमा ,
चारवटा विकल्प हुन्छन् , जून ।

गल लगाएर पल्टाए पनि ,
आखिर ढुङ्गा माटो मै बजारिन्छ ।
किनकि
उड्ने चरालाई हाँगोमा भन्दा ,
आफ्नै पखेटामा विस्वास हुन्छ , जून ।

मरिच किन चाउरियो ,
आफ्नै पिरोमा रुमलिएर ।
किनकि
चोरी औंला तेर्साएर अरुको खोट देखाइरहँदा ,
चार औंलाले आफैंलाई गिज्याइरहन्छ्न, जून ।

सबैथोक दिने तिम्रो शहरले ,
चाडपर्वमा बास दिदैंन ।
किनकि
तिम्रो त गाउँमा मन छ ,
तर शहरको त मन हुँदैन क्यारे , जून ।

२०८१ आस्विन २३, दमक , झापा ।